ಯಾರದೀ ಧ್ವನಿಯು?

ಯಾರದೀ ಧ್ವನಿಯು?

ಹಾದಿ ಮುಚ್ಚಿದೆ, ಗುಡಿಯು ಮುಚ್ಚಿದೆ,

ಮುಚ್ಚಿವೆ ಮಾಲ್, ಕಂಪನಿ.

ತೆರೆದಿವೆ ಆಸ್ಪತ್ರೆ , ಇಂಧನ,

ದಿನಸಿ, ಔಷದಿ ಅಂಗಡಿ.

ತೆರೆಯಿತೆ ಎದೆ ಕದಗಳು?

ಕವಚ ಮುಚ್ಚಿದ ಮುಖದ ಕಣ್ಣಲಿ

ಬತ್ತಿವೆ ಭರವಸೆಗಳು.

ಆಸೆಗಳ ನೆಲದ ಮಣ್ಣಲಿ

ಬತ್ತಿವೆ ಮಳೆ ಹನಿಗಳು.

ಜಿನುಗಿತೆ ಹೊಸ ದೃಷ್ಟಿಯು?

ನಡೆವ ದಾರಿಯ ಉಬ್ಬು ತಗ್ಗಲಿ

ನನ್ನದೊಂದೇ ಹೆಜ್ಜೆ ಜಾಡು.

ಏಕವಾಗಿದೆ ಕಾಡು-ನಾಡು,

ಪ್ರಾಣಿ-ಪಕ್ಷಿ, ಬದುಕು-ಬೀಡು.

ಏಕವಾಯಿತೆ ಮೇಲೆ-ಕೀಳು?

ಗಾಢ ಮೌನದ ಮಡುವಿನಲ್ಲಿ

ಕೇಳಿಸಿದೆ ಅಜ್ಞಾತ ಧ್ವನಿಯು.

ಯಾರ ದನಿಯೋ ತಿಳಿಯದಾದೆ

ಕೂಗಿ ಕೇಳಿದೆ ಅರಿವನು!

ಯಾರದೀ ಧ್ವನಿಯು?

        -   17-Apr-2020 ( ಕರೋನ ಸಮಯ)